منہاج القرآن ویمن لیگ کے زیر اہتمام 3 روزہ تربیتی و تنظیمی، اخلاقی، روحانی، اصلاحی کیمپ 11 سے 13 نومبر 2016ء تک مرکزی سیکرٹریٹ ماڈل ٹاون میں منعقد ہوا۔ کیمپ میں چاروں صوبوں سے ضلعی اور تحصیلی عہدیدار خواتین نے شرکت کی۔ پروگرام کا باقاعدہ آغاز تلاوت قرآن مجید اور نعت مبارکہ سے ہوا۔ جس کی سعادت نظامتِ اطفال کی ڈائریکٹر حافظہ ایمن یوسف نے حاصل کی۔ پشاور سے سیدہ زرتاج بخاری نے ہدیہ نعت پیش کیا۔ افتتاحی سیشن میں مرکزی ناظمہ تربیت عائشہ مبشر نے استقبالیہ پیش کیا اور کیمپ کے شیڈول پر بریفنگ دی۔ مرکزی ناظمہ ویمن لیگ محترمہ افنان بابر سال 16-2015ء کی کارکردگی رپورٹ پیش کرتے ہوئے تحصیلی عہدیداروں سے ان کے علاقے کی سیاسی و سماجی اور مذہبی صورتحال اور رحجانات پر تبادلہ خیال کیا۔
کیمپ کے دوسرے روز مرکزی ناظمہ محترمہ افنان بابر نے فیلڈ کی صورتحال کی مناسبت سے تیار کردہ مفصل ورکنگ پلان پیش کیا جس میں فیلڈ کے ورکنگ پلان اہداف سمیت مختلف پروجیکٹس کے نصابات کا تعارف پیش کیا، جن میں میلاد مہم پلان، الاربعینات، حیٰ علٰی الفلاح، الہدایہ وائس، ایگرز اور داعی کا نصاب شامل تھا۔ بعدازاں مرکزی نائب ناظمِ اعلٰی تنویر احمد خان نے اصلاحی تحریکوں کا آغا زاور کامیابیوں کو برقرار رکھنے کے حوالے سے ’’تحریک کے مراحل خمسہ‘‘ پر خصوصی لیکچر بھی دیا۔
کیمپ کے تیسرے روز مرکزی صدر منہاج القرآن ویمن لیگ فرح ناز نے خطاب کیا۔ انہوں نے کہا کہ آبادی کے نصف کو جدید دینی و دنیاوی علوم اور تربیت سے محروم رکھنا ترقی اور اصلاح سے انکار ہے۔ انتہا پسندی اور دہشتگردی کے ناسور سے نجات کیلئے خواتین مرکزی کردار ادا کر سکتی ہیں، معاشرے میں علم، امن اور خوشحالی لانے کیلئے خواتین کی تعلیم و تربیت پر فوکس نا گزیر ہے۔
کیمپ میں منہاج القرآن ویمن لیگ کی طرف سے بانی و سر پرست منہاج القرآن شیخ الاسلام ڈاکٹر محمد طاہرالقادری کی ہدایات کے مطابق خواتین اور بچوں کی دینی، اخلاقی، روحانی تعلیم و تربیت کیلئے 5 تربیتی پروگرامز کی منظوری دی گئی۔ ان اصلاحی پروگرامز کے تحت منہاج القرآن ویمن لیگ کی تنظیمات ملک بھر میں جدید ذرائع ابلاغ کے ذریعے خواتین اور بچوں کو اسلامی تعلیمات سے روشناس کروانے اور انہیں سوسائٹی کا ایک مفید فر د بنانے کیلئے کردار ادا کریں گی۔ اس کیلئے ٹرینرز کی تربیت کا بھی میکانزم طے کیا گیا۔
ٹریننگ کیمپ کی سیکرٹری عائشہ مبشر نے منظور کئے جانیوالے تربیتی پروگرامز کے حوالے سے کہا کہ الاربعینات پروگرام سے مراد احادیث مبارکہ کی روشنی میں بنیادی عقائد کی اصلاح، حی علی الفلاح پروگرام تین سے پندرہ سال کی بچیوں کو دینی علوم کی بنیادی معلومات سے روشناس کروانا ہے جبکہ الہدایہ وائس کے ذریعے پوش علاقہ جات کی پڑھی لکھی خواتین سے مکالمہ اور تربیت کا اہتمام کیا جائیگا۔ انہوں نے کہا کہ آج علم کی کثرت ہے مگر تربیت کا قحط ہے۔ ان تربیتی تقاضوں کو پورا کرنے کیلئے مذکورہ پروگراموں کا آغاز کیا جا رہا ہے۔ 3 روزہ تربیتی کیمپ سے ام کلثوم، سنبل اعوان اور زینب ارشد نے بھی خطاب کیا۔
محترمہ ام کلثوم، سنبل اعوان اور زینب ارشد نے بھی ٹریننگ کیمپ سے خطاب کیا۔ تربیتی کیمپ میں درگاہ شاہ نورانی میں دہشتگردی اور خواتین اور بچوں کی شہادت پر گہرے دکھ کا اظہار کیا گیا اور واقعہ کی شدید الفاظ میں مذمت کی گئی۔ تین روزہ کیمپ کا اختتام دعائے خیر سے ہوا، جس کے بعد ظہرانہ کا بھی اہتمام تھا۔
دریں اثناء کامیاب تربیتی کیمپ کے انعقاد پر ڈاکٹر طاہرالقادری نے ویمن لیگ کی جملہ عہدیداران اور نائب ناظم اعلیٰ کوآرڈینیشن تنویر خان کو مبارکباد دی۔
تبصرہ