علم کا اصل مقصود معلومات کا حصول نہیں بلکہ خشیتِ الٰہی ہے، علم کے حصول میں ادب اور تقوی کو شعار بنانا ہی اصل کامیابی ہے: پروفیسر ڈاکٹر حسن محی الدین قادری
چیئرمین سپریم کونسل منہاج القرآن انٹرنیشنل کا منہاج کالج برائے خواتین کی سالانہ تقریبِ تقسیمِ انعامات میں ’’علم کی عظمت اور اہل علم کی فضیلت‘‘کے موضوع پر خصوصی خطاب، چیئرمین سپریم کونسل منہاج القرآن انٹرنیشنل پروفیسر ڈاکٹر حسن محی الدین قادری نے سورۃ الزمر کی آیت "قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ" کی وضاحت بیان کرتے ہوئے کہا کہ اللہ تعالیٰ کے نزدیک جاننے والے اور نہ جاننے والے کبھی برابر نہیں ہو سکتے۔
علم کے معانی و مفاہیم بیان کرتے ہوئے ان کا کہنا تھا کہ علم محض معلومات کا نام نہیں، بلکہ اس کا اصل ثمرہ اللہ کا خوف اور خشیتِ الٰہی ہے۔ علماء کے مختلف مراتب ہیں، ایک وہ عالم ہے جو کائنات کی تخلیق میں غور و فکر کرتا ہے۔ دوسرا وہ ہے جو قرآنِ مجید کے معانی و احکام میں تدبر کرتا ہے، کچھ علماء ظاہری علوم کی روشنی پھیلاتے ہیں، کچھ باطن کو منور کرتے ہیں، اور کچھ ایسے ہیں جن کی زندگی سیرتِ مصطفیٰ ﷺ کا عکس بن جاتی ہے۔ انہوں نے حضرت ربیع بن انس رضی اللہ عنہ کا قول نقل کیا کہ ’’جس کے دل میں اللہ کی خشیت نہیں، وہ حقیقی عالم نہیں۔‘‘
پروفیسر ڈاکٹر حسن محی الدین قادری نے اپنی گفتگو میں ایک ایمان افروز واقعہ بیان کیا جس میں نبی کریم ﷺ نے حضرت ابوذر غفاری رضی اللہ عنہ سے فرمایا کہ ’’اگر تو رات اس حال میں گزارے کہ اللہ کی کتاب کی ایک آیت پر غور و فکر کرے، تو یہ تیرے لیے سو رکعت نفل سے افضل ہے۔ اور اگر علم کا ایک باب سمجھ لے، تو یہ ہزار رکعت نفل سے بہتر ہے۔‘‘
پروفیسر ڈاکٹر حسن محی الدین قادری نے طالبات کو نصیحت کرتے ہوئے کہا کہ علم حاصل کرو، کیونکہ علم کی طلب خود خشیتِ الٰہی کے برابر ہے۔ علم صرف ڈگری یا پیشے تک محدود نہیں بلکہ یہ زندگی کے ہر پہلو میں رہنمائی اور آخرت میں نجات کا ذریعہ ہے۔ منہاج کالج برائے خواتین عام تعلیمی ادارہ نہیں، بلکہ یہاں معلم کی ذمہ داری ہے کہ علم کے حصول کے ساتھ ساتھ طالبات کی دینی و فکری آبیاری بھی کی جائے۔ انہوں نے تقریب میں موجود فاضلات اور طالبات کو علم حاصل کرنے کے ساتھ ساتھ ادب کو اپنا شعار بنانے کی تلقین کی۔
تقریب میں صدر منہاج القرآن ویمن لیگ انٹرنیشنل ڈاکٹر غزالہ قادری، محترمہ فضہ حسین قادری، پرنسپل منہاج کالج برائے خواتین آفتاب احمد خان، نائب ناظم اعلیٰ تنظیمات ڈاکٹر رفیق نجم، ڈائریکٹر کالجز ونگ کمانڈر محمد غفار، برانچ منیجر الفلاح بینک بابر چوہدری، منہاج ڈویلپمنٹ کونسل الطاف رندھاوا، ڈائریکٹر منہاج ویلفیئر فاؤنڈیشن پاکستان ثنااللہ خان، وائس پرنسپل ڈاکٹر حمیراناز، ڈاکٹر یاسمین ظفر، ڈاکٹر جویریہ حسن، ڈاکٹر غلام احمد خان سمیت ویمن کالج کے فکلیٹی و سٹاف ممبران اور طلباء نے بڑی تعداد میں شرکت کی۔
تقریب میں انٹرمیڈیٹ، الشہادہ العالیہ اور الشہادہ العالمیہ کے مختلف سیشنز میں پوزیشنز حاصل کرنے والی طالبات کو شیلڈز اور سرٹیفیکیٹس دیئے گئے، اور نمایاں کارکردگی کا مظاہرہ کرنے والے فکیلٹی و سٹاف ممبران کو تحسینی شیلڈز دی گئیں۔
تبصرہ