دینی نہج پر خواتین کی تعلیم و تربیت ناگزیر ہے:خرم نواز گنڈاپور
سیمینارسے لبنیٰ مشتاق، ڈاکٹر بشریٰ ریاض، ثناء وحید، عائشہ مبشر و دیگر کا خطاب
لاہور(6 جنوری 2026) منہاج القرآن ویمن لیگ کے 38ویں یوم تاسیس پر مرکزی سیکرٹریٹ میں سیمینار منعقد ہوا۔ سیمینار سے خطاب کرتے ہوئے ناظم اعلیٰ خرم نواز گنڈاپور نے کہا کہ دینی نہج پر خواتین کی تعلیم و تربیت وقت کی ناگزیر ضرورت ہے۔ انہوں نے کہا کہ تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری کو یہ اعزاز اور امتیاز حاصل ہے کہ انہوں نے مردوں کے ساتھ ساتھ خواتین کی تعلیم و تربیت کے بھی بے مثال ادارے قائم کئے اور خواتین کو داعیہ کے طور پر تیار کیا جو آج پاکستان بھر میں خواتین کی تعلیم و تربیت کے ساتھ ساتھ انہیں وطن عزیز کا ایک فعال شہری بنانے کے لئے کردار ادا کرررہی ہیں۔ شیخ الاسلام سمجھتے ہیں کہ خواتین کو تعلیم و تربیت کے مرکزی دھارے میں لائے بغیر ترقی کا کوئی بھی ہدف حاصل نہیں کیا جا سکتا۔
نائب صدر منہاج یورپین کونسل اور دیرینہ رفیقہ منہاج القرآن ویمن لیگ ڈاکٹر بشریٰ ریاض نے ویمن لیگ کی تاریخی جدوجہد پر روشنی ڈالتے ہوئے کہا کہ منہاج القرآن ویمن لیگ گزشتہ 38 برسوں سے خواتین کی دینی، اخلاقی اور فکری تربیت کے ذریعے معاشرتی اصلاح میں نمایاں کردار ادا کر رہی ہے۔ انہوں نے تحریک منہاج القرآن کے بانی و سرپرست اعلیٰ شیخ الاسلام ڈاکٹر محمد طاہرالقادری کے وژن کو خراج تحسین پیش کیا جس کے تحت خواتین کو دعوت دین، تربیت اور قیادت کے میدان میں موثر مواقع مل رہے ہیں۔ اس موقع پر منہاج القرآن ویمن لیگ کی دنیا بھر میں قائم تنظیمات کی جانب سے مادر تحریک محترمہ رفعت جبیں قادری کو ان کی بے مثال خدمات پر خراج تحسین پیش کیا گیا۔
یومِ تاسیس کی اس پُرمسرت تقریب میں تنظیمی استحکام، فکری تربیت اور دعوتی خدمات میں نمایاں کردار ادا کرنے والی سینئر ذمہ داران کو ان کی بے لوث محنت، استقامت اور قربانیوں کے اعتراف میں یادگاری شیلڈز پیش کی گئیں۔
سیمینار سے شمیم خان، ڈاکٹر حمیرہ ناز، ڈاکٹر شازیہ بٹ، عائشہ مبشر، ثناء وحید، ارشاد اقبال، ڈاکٹر جویریہ حسن و دیگر نے خطاب کیا۔ اختتام پر 38ویں یوم تاسیس کی مناسبت سے کیک کاٹا گیا اور وطن عزیز کی سلامتی اور خوشحالی کے لئے دعا کی گئی۔
تبصرہ