والدین کا کردار نوجوان نسل کی تربیت میں کلیدی حیثیت رکھتا ہے
دین پابندی نہیں بلکہ نظم و ضبط اور توازن کا نام ہے: بانی و سرپرست اعلیٰ منہاج القرآن انٹرنیشنل
بانی و سرپرست اعلیٰ منہاج القرآن انٹرنیشنل شیخ الاسلام ڈاکٹر محمد طاہرالقادری نے منہاج القرآن انٹرنیشنل ویمن لیگ ناروے کی رہنما و کارکنان خواتین سے ملاقات کی اور ان سے خطاب کرتے ہوئے کہا کہ اسلام محض وقتی یا رسمی عبادات تک محدود نہیں بلکہ ایک ہمہ وقت جاری رہنے والا مکمل طرزِ حیات ہے، جو زندگی کے ہر پہلو پر اثر انداز ہونا چاہیے۔ اس موقع پر چیئرمین سپریم کونسل منہاج القرآن انٹرنیشنل پروفیسر ڈاکٹر حسن محی الدین قادری اور صدر منہاج ویمن لیگ انٹرنیشنل ڈاکٹر غزالہ حسن قادری بھی موجودتھیں۔
شیخ الاسلام ڈاکٹر محمد طاہرالقادری نے کہا کہ آج کل بہت سے لوگ دین پر موسمی انداز میں عمل کرتے ہیں، جس کے باعث ایمان اور روزمرہ زندگی کے درمیان فاصلہ پیدا ہو جاتا ہے۔ انہوں نے کہا کہ دین کو ہماری سوچ، عمل اور ماحول کا فطری حصہ بننا چاہیے، نہ کہ اسے روزمرہ زندگی سے الگ رکھا جائے۔ انہوں نے کہا کہ جس طرح معاشرتی قوانین متعین حدود کے اندر آزادی فراہم کرتے ہیں، اسی طرح دین بھی انسان کو حدود و قیود کے اندر رہتے ہوئے حقیقی آزادی عطا کرتا ہے۔ دین پابندی نہیں بلکہ نظم و ضبط، توازن اور درست سمت کا نام ہے۔
شیخ الاسلام نے کہا کہ دین پر مستقل عمل نہ ہونے کی وجہ سے خصوصاً نوجوان نسل میں شناخت کا بحران پیدا ہو رہا ہے۔ اس صورتحال میں والدین کا کردار نہایت اہم ہے۔ دینی سرگرمیوں کا مقصد ایسی مستقل اقدار پیدا کرنا ہونا چاہیے کہ دین زندگی کا فطری حصہ بن جائے۔ اس موقع پر ثمین شبیر، سائرہ نثار، اقراء اعجاز احمد اور خدیجہ محمود کو نمایاں کارکردگی پر شیلڈز دی گئیں، جبکہ مختلف فورمز کی کارکنان کو سرٹیفکیٹس بھی دیے گئے۔ شرکاء میں نازیہ بتول، ثمینہ اسحاق، حلیمہ صدیق، اقراء مشتاق خان، عائشہ خان اور نازیما انصاری سمیت دیگر خواتین رہنما و کارکنان شامل تھیں۔
تبصرہ