منہاج القرآن ویمن لیگ سرگودھا کے زیرِاہتمام سرگودھا میں ایک جامع اور بامقصد Al-Tarbiyah Reinforcement Training Workshop کا انعقاد کیا گیا، جس میں سرگودھا جنوبی، شمالی اور وسطی اضلاع سے تعلق رکھنے والی ضلعی و تحصیلی ذمہ داران اور کارکنان نے بھرپور شرکت کی۔ اس ورکشاپ کا بنیادی مقصد تنظیمی نظام کو مضبوط بنانا، تربیتی صلاحیتوں کو بہتر بنانا اور کارکنان کو فکری و عملی رہنمائی فراہم کرنا تھا تاکہ وہ میدانِ عمل میں مزید مؤثر کردار ادا کر سکیں۔
پروگرام کا آغاز تلاوتِ قرآن پاک سے ہوا جس نے روحانی فضا کو معطر کر دیا۔ بعد ازاں شرکاء کو خوش آمدید کہا گیا اور ورکشاپ کے اغراض و مقاصد بیان کیے گئے، جن میں تعمیرِ افکار، تشکیلِ کردار اور تنظیمی استحکام کو مرکزی حیثیت حاصل تھی۔
ورکشاپ کی مرکزی نشست میں محترمہ لبنیٰ مشتاق (ہیڈ کوآرڈینیشن کونسل منہاج القرآن ویمن لیگ) نے نہایت مدلل، فکر انگیز اور جامع خطاب فرمایا۔ انہوں نے تحریک منہاج القرآن کے اغراض و مقاصد پر روشنی ڈالتے ہوئے کہا کہ اس تحریک کا بنیادی ہدف دین اسلام کی حقیقی تعلیمات کو فروغ دینا، معاشرے میں اخلاقی و روحانی اقدار کو بحال کرنا اور ایک ایسے مصطفوی معاشرے کا قیام ہے جو محبت، رواداری، عدل اور اخوت پر مبنی ہو۔
انہوں نے خواتین کے کردار کو اجاگر کرتے ہوئے کہا کہ ماں بچے کی پہلی درسگاہ ہوتی ہے اور اسی کے ذریعے ایک نسل کی فکری، اخلاقی اور روحانی تربیت ہوتی ہے۔ اگر ماں خود علمِ دین سے آراستہ ہو، اپنی اصلاح کرے اور عملی نمونہ بنے تو وہ ایک بہترین نسل کی پرورش کر سکتی ہے۔ انہوں نے اس بات پر بھی زور دیا کہ موجودہ دور میں میڈیا اور معاشرتی اثرات کے باعث تربیت ایک بڑا چیلنج بن چکی ہے، لہٰذا ماؤں کو مزید باشعور، باخبر اور متحرک ہونا ہوگا۔
محترمہ لبنیٰ مشتاق نے اپنے خطاب کے اختتام پر شرکاء کو عملی طور پر متحرک کرنے کے لیے ایک بامقصد سرگرمی بھی کروائی، جس میں شرکاء نے اپنی ذمہ داریوں اور زندگی کے مقصد کے حوالے سے اظہارِ خیال کیا۔
ورکشاپ کے اہم سیشنز میں محترمہ حافظہ سحر عنبرین (ممبر کوآرڈینیشن کونسل منہاج القرآن ویمن لیگ) نے مراکزِ علم کے موضوع پر گفتگو کرتے ہوئے کہا کہ علم دراصل نور ہے اور اس کے بغیر زندگی اور معاشرہ تاریکی کا شکار ہو جاتا ہے۔ انہوں نے واضح کیا کہ حقیقی علم وہ ہے جو نہ صرف انسان کی اپنی اصلاح کرے بلکہ دوسروں تک منتقل ہو کر اجتماعی بہتری کا سبب بنے۔ انہوں نے مزید کہا کہ منہاج القرآن کے بنیادی مقاصد میں علم کا فروغ اور تربیت کا اہتمام شامل ہے، اور اس کے لیے معاشرے میں مراکزِ علم کے قیام کو ناگزیر قرار دیا۔
اسی طرح ایگرز ڈیپارٹمنٹ کے حوالے سے محترمہ حناء فاطمہ (ڈپٹی ڈائریکٹر ایگرز) نے تفصیلی بریفنگ دی۔ انہوں نے بتایا کہ ایگرز ایک منظم اور فعال پلیٹ فارم ہے جو بچوں کی ہمہ جہت تعلیم و تربیت کے لیے کام کر رہا ہے۔ اس کے ذریعے بچوں کو ابتدائی عمر سے ہی قرآنِ مجید، بنیادی دینی تعلیمات، دعائیں، سیرت النبی ﷺ اور روزمرہ زندگی کے آداب سکھائے جاتے ہیں۔ اس کے ساتھ ساتھ بچوں کی ذہنی اور تخلیقی صلاحیتوں کو نکھارنے کے لیے کہانی سنانا، کوئز، آرٹ اینڈ کرافٹ اور گروپ ایکٹیویٹیز جیسی سرگرمیاں بھی کروائی جاتی ہیں تاکہ سیکھنے کا عمل دلچسپ اور مؤثر بنایا جا سکے۔
ورکشاپ میں ایک خصوصی سوال و جواب سیشن بھی منعقد کیا گیا، جس میں شرکاء نے تنظیمی اور تربیتی امور سے متعلق سوالات کیے جن کے تفصیلی اور تسلی بخش جوابات دیے گئے۔ اس کے علاوہ تنظیم سازی کے حوالے سے عملی رہنمائی فراہم کی گئی اور ٹیم ورک کو مضبوط بنانے کے لیے مختلف سرگرمیاں کروائی گئیں، جس سے شرکاء کی دلچسپی اور سیکھنے کا عمل مزید مؤثر ہوا۔
پروگرام کے اختتام پر ضلعی و تحصیلی ذمہ داران کی خدمات اور کاوشوں کو سراہا گیا اور انہیں خراجِ تحسین پیش کیا گیا۔ یہ ورکشاپ علم، تربیت اور تنظیمی استحکام کے حوالے سے ایک کامیاب اور مؤثر پیش رفت ثابت ہوئی۔
تبصرہ